Jahrgang 1940 Laupersdorf
Eusem Johrgang 1940 zur Klassezämekunft
Marieli Schibler-Walser
Mir fiire hüt es bsungers Fest,
mir aui si hüt Ehregescht.
En jedes zöut hür 70 Johr,
das isch nüm so jung, aber vo aut no kei Gfohr.
Ig entbiete Euch ä frohe Gruess
und was i grad no säge muess,
siit härzlich do willkomme im Sunnesaal,
im Heimatdorf, im schöne ThaI.
Mir wei eus hüt doch zäme freue,
auti Fründschaftsband erneue.
En Klass isch au ä Läbesbund,
vor Jugend bis zur letschte Stund.
Dr Johrgang 40 macht eus verwandt,
vöu Gschehnis si nur eus bekannt.
En Klassekamerad isch doch ä Fründ,
däm me niemals d'Treui chünd.
Einisch isch für eus dr erschti Schueltag cho,
hei der Schuelsack stouz a Rügge gno.
Mir chline Meitschi und chline Buebe si stouz zum Schuelhuus cho
und hei vo dr Muetter Abschied gno.
Im grosse Schuelhuus denn herje,
het's vöu zum Stuune und zum Luege ge.
Schüüch si mir i die herte Bänkli gsässe,
dr erschti Schueltag, nei, dä cha me nit vergässe.
D'Lehrerin Vivaz het eus denn fründlich glehrt,
au Tag es bitzeli euses Wüsse gmehrt.
Si het eus bibrocht das und deis,
natürlich s'ABC und's Einmaleins.
Eis Johr ums angere isch denn langsam umegange
und mängisch hei mir afo plange.
Oh, wär die Schuelziit doch verbi,
möcht nümme lehre, es si jo gnue Jöhrli gsi.
Doch d'Schuelziit muess en jedes dürestoh
und einisch isch das Aendi ändlich cho.
Mit Sehnsucht dänkt hüt jedes zrugg,
d'Schuelziit isch es Stück vom Jugendglück.
Wenn Du no eine hesch im Chopf,
verzöu ne hüt, süsch git's en Chropf.
S'passiere doch zu aune Ziite Sache,
wo me no spöter drab muess lache.
Bou isch e neui Stimmig denn erwacht,
het us eusne Buebe Nachtschwärmer gmacht.
Vor eme Fänschter irgendwo si si bliebe stoh,
hei dänkt: schloft ächt mis Schätzli scho.
Ziit vergoht, es git kei Halt,
ach Gott, do heisst's wie bald wie bald.
Hüt si mir jo scho 70 Jährli alt.
Doch hüt bi dere Zämekunft isch's eifach wunderbar,
mir si bim Eid ä wackri Schar.
Flotti Manne und hübschi Fraue,
eus darf me no g'seh, eus darf me no g'schaue.
Die meischte vo eus aune hei scho graui Hoor,
au s'Ränzli bi de Manne isch gwachse i dene Johr.
Mir Fraue si au nümm so schlank,
mir hätte nümme Platz im Schuelerbank.
Vöu vo eus cheu doch scho Grossching gaume,
hättet dir euch das lo traume?
Im Läbe stoht ä mänge wit vora,
jawohl, so ne Johrgang muess me ha.
Auso no vöu Vergnüege und es guet's Glinge,
wei mitenand ä schöne Tag verbringe.
Spöter bi me ne Glesli Wii,
chönt's denn immer luschtiger si.
© 2016 Impressum