Jahrgang 1940 Laupersdorf
Rückblick von Marieli
Do mir jo das Johr dr 75. Geburtstag chöi fire, die einte hei das schöne Fescht scho hinger sich und es paar angeri hei’s no zguet, wett i euch churz die letztschte 10 Johrgangsträffe no einisch zämefasse. I ha dr Sepp zerscht gfrogt, ob i äs paar Wort zu öich dörfi säge, obwou är hüt die interessanti Klassezämekunft für eus vorbereitet het und ihm au glunge isch. I wöu do drzue keini Wort verlüre, denn dr Gregor macht ä härzliche Dank jo jedes Johr per Mail oder per Poscht. So wette mir ihm hüt au einisch miteme härzliche Applaus danke säge.
Sit mir pangsioniert worde sie, i säge jetz mit 65-gi, so dass d’Manne au gmeint si, hei mir eus jedes Johr amene angere Ort troffe, das natürlich eus 1940er, wo z’Laupersdorf wohne, ä ganz grossi Freud gmacht het, wenn sich ä uswärtige Schuelkamerad oder -kameradin sich gmäudet het, s’nöchschte Klasseträffe z’organisiere.
S’einte oder s‘angere het sich sicher au scho gfrogt, jä wo simmer äch de gsi?
Am 27. Okt. 2005, auso wo mir 65-gi gsi si, hei mir s’Klasseträffe in Laupersdorf, i öisem Heimatdorf gfiret. Dr Bsuech im Kamm-Museum z’Mümliswil wird für euch lehrrich und interessant gsi si. Am Obe isch me nach Matzedorf is Hotel Stärne go z’Nacht ässe.
I möchte a dere Stöu grad bifüege, dass i 2005, 2006 und 2007, auso 3 mou, us gsundheitliche Gründ i minere Familie, das Träffe nit bsuecht ha und deshaub nit so usfüehrlich cha drüber brichte.
Im Sept. 2006 ha ni leider nümme gwüsst, wo das Träffe stattgfunge het. Aber keis Problem, i ha gwüsst, dass dr Gregor jedes Klasseträffe gründlich niedergschriebe het. Auso: Damaus het s’Franziska und dr Gregor dä Tag zämegschtöut. So sit dir mit de Autos uf d’Mieschegg gfahre und vo dört us z’Fuess ca. 1 Std. i hinger Brandbärg gspaziert. Dört hei si grad Metzgete gha, ohne dass die zwöi das zum Vorus gwüsst hei, und so het jedes si Gluscht mit ere guete Blut-, Läber- oder Brotwurscht chönne stille.
Am 27. Sept. 2007 het dr Rolf in Gränche die Zämekunft organisiert mit dr Besichtigung vom Flugplatz, gfüehrt vom Peter Brotschi, es Mitglied vom Verwautigsrot vom Regionauflugplatz z’Gränche. I ha mi bim Rolf entschoudiget und aus Dankeschön ä Asichtscharte mit aune öichne Ungerschrifte erhaute, was mi usserordentlich g’fröit het, dass dir mi i dene drü Johr nit vergässe heit.
Am 25. Sept. 2008 het sich dr Boner Urs zur Verfüegig gstöut und eus Schuelkamerade zu mene Tag im Buechibärg iglade, dure Waud chrüz und quer, ufe und abe. Er het öis zunere Mühli gfüehrt, wo mir öis ä die aute Zite erinneret hei, wie me de so gschaffet het. Am Obe het är öis aui no zu sich hei iglade, wo’s no z’Trinke und feini Sache z’ässe ge het.
Am 24. Sept. 2009 si mir zum Edgar nach Bülach greiset zu nere interessante Stadtbesichtigung, begleitet vom Köbi Menz, dä öis die verschiedene Riegugeböide erklärt het und aune wo ä Frog gha hei, Uskunft gä het. Im Rothus si mir aus grossartigi Gescht a d’Tische gsässe und hei öis wie Rotsmitglieder gfüehlt. Au das bekannte Marronigässli, glaub i, hei mir no guet in Erinnerig. Bi me ne guete Mittagässe im goudige Winkel het’s de no ä gmüetlichi Stimmig gä.
Am 30. Sept. 2010, auso im Johr, wo mir 70-gi worde si, hei mir wieder z’Laupersdorf dä schön Tag verbrocht. Zerscht hei mir nis bi Kaffi und Gipfeli bi mir deheime, im Schattehüsli, für ne churze Momänt chönne verwile. Aschliessend isch ä Besichtigung i dr Famtech, Kunststofftechnologie uf em Programm gstange. Mit de Autos si mir de i „d’Läbere“, is Aenerhouz, i Waud gfahre zumene schöne Ussichtspunkt. Bi me ne Apéro mit e me guete Tropfe Wi und feiner Züpfe hei mir de chönne euses Dorf bewundere.
Am 29. Sept. 2011 het öis dr Kurt nach Herzogebuchsee iglade. Dr Träffpunkt isch bim Resterant Kreuz z’Oberönz gsi, wo mir zur Ueberraschig d’Kegubahn unsicher gmacht hei, so dass die Babeli numme so gschriebe hei chönne wärde. Nach em feine Mittagässe isch dä Tag bim „Becker Kurt“ deheime, bi vöu feine, säubergmachte Desser, aus was s’Härz begehrt, gmüetlich usklunge.
Am 27. Sept. 2012 het’s Vreni d’Organisation i d’Häng gno. Aes het öis nach Herbetswil is Resterant Reh, a Fischerteich gfüehrt, wo mir mit eme guete Imbiss bedient worde si. Es het aues so guet klappet, dass emu keis nach Herbetswil het müesse laufe. S’Mittagässe hei mir de im Rest. Sonne z’Laupersdorf igno. Dä schön Tag isch de deheim bim Vreni z’Matzedorf usklunge.
Am 26. Sept. 2013 het’s öis is Wallis zum Kari zoge. Aer het öis zu sim Cämpingplatz begleitet, wo öis si Frau, s’Lisbeth, ä Vorspies mit eme Apéro serviert het. Aus witer’s het öis die Reis is Brigerbad gfuehrt, das sich grad im Umbou befunge het. Dr Herr Diräkter Schnydrig het öis erklärt, wurum dä Umbou nötig gsi isch und het uf au öisi Froge Uskunft ge. Zum Glück het’s nit gheisse: „So und jetz is Wasser!“ Do hätti jo keine d’Badhösli oder keis s’Bikini derbi gha! En Stadtrundfahrt mit em Bändli dur Brig hei mir denn dörfe gniesse. Am Obe, bevor mir öis verabschiedet hei, hei mir öis no mit eme Bierli dr Durscht chönne lösche.
Am 25. Sept. 2014 het sich dr Pauli vo Bauschtu bereit erklärt, d’Organisation z’übernä. Er het öis i Energy Park brocht, wo im Ralph Martens ghört. Die vöue Oldteimer und Tanksüle hei vöu z’stune ge. Mit de Autos si mir de zum z’Mittagässe i Sunnebärg is Resterant Brämgarte gfahre. So hei öisi Uswärtige öisi Heimat vo dr angere Site gseh, zerscht dr „Läberebärg“ und de dr „Sunnebärg“. Nach em Desser het dr Pauli jedes miteme Gschänkli überrascht. Nit vergässe hei mir öisi verstorbne Schuelkamerade/-inne, wo uf öisem Friedhof ruehie und dene mir immer, wenn mir z’Laupersdorf si, ä Greberbsuech abstatte. Im Resterant Jegerstübli het de dä Tag no usklunge.
Hüt, am 24. Sept. 2015 cha n‘ ig im Sepp es Komplimänt mache, denn mir hei vöu gseh und erläbt, die Klassezämekunft isch dir glunge. Es Dankeschön vo öis aune Awäsende 1940-er und au ä Dank a di Frau, wo öis so nätt bedient het.
Marieli Schibler
© 2016 Impressum